http://www.crtvg.es/flowplayer3/flowplayer.commercial-3.2.7.swf
Acabo de recibir as fotos do trinque que a librería infantil El Pozo de los tres deseos montou na súa librería da Rúa do Sol(Cangas). Artur está no seu trinque como na casa, a salvo de calquer sombra. A acollida dos libreiros de Cangas a Artur está sendo moi boa. Sen eles, os libros non cobrarían vida.
Grazas.
O vindeiro sábado, ás 10,20 estaremos Marc Taeger e eu con María Xosé Rodríguez no programa matinal da radio pública SOMOS QUEN para falar de Artur. Estaremos dispostos a descubrir os segredos do nacemento de Artur, as incidencias que tivo que salvar para ver a luz nun día de mediados do mes de xullo. Seguro que pasaremos un momento agradable escoitando a lectura dramática que, segundo me dixeron, prepararon os locutores da RG.
O próximo martes, 23 de agosto faremos a presentación de Artur en Cangas. a partir das 8 da tarde podedes coñecer a Artur no Salasón. Podedes deixar a praia unha horiña antes, se hai bo tempo, e achegarvos.
Ah! chegade cedo que imos ser moitos.
Onte, 8 de agosto, Marc Taeger e máis eu tivemos a ocasión de presentar a Artur por primeira vez. Foi na Coruña cun magnífico día de sol cun chisco de aire do norte.
A introdución correu a cargo de Paz Castro, encargada de prensa de Faktoría K e Kalandraka, que soubo sacar de nós o que nós non soubemos contar.
Aquí deixo unhas fotos para dar fé de que estivemos alí.
A próxima presentación terá lugar en Cangas, no Salasón, un local que está facendo unha estupenda programación musical e de exposicións.
Presentación de Artur
Se vos pilla perto, podedes achegarvos. Entrada recomendable para nenos de 3 a 100 anos. Estaremos encantados de contar coa vosa presenza.
Portada do libro ilustrada por Marc Taeger
Xa podedes follear nas librerías o último libro, que comparto co ilustrador Marc Taeger. Batín con el de xeito inesperado no trinque dunha librería. Creo que non estaba preparado para aceptar que o libro xa é dos lectores, aínda tiña interiorizado que formaba parte do ámbito doméstico dos creadores, editores e amigos, pero xa non é así. Sucedeume pasando por diante de “El pozo de los tres deseos” e pouco despois, no trinque da Librería Viláfer atopei con tres exemplares. Hai unhas horas foron os amigos da Librería Abrente que o publicaron na súa páxina oficial e hai uns minutos a Libraría O Pontillón en Moaña.
A pena é que non temos feira do libro en Cangas, que era onde pensaramos facer a presentación oficial, pero traballaremos para facelo durante as próximas semanas en Cangas, Bueu e Moaña. Por certo, non esquezades, que o día 8 de agosto temos a presentación na feira de Coruña. Pero non perdades ocasión, podedes mercalo nun fato de linguas diferentes, non hai desculpas para non lelo.
Ánimo e á librería!
A por el!
Kalandraka acaba de confirmar que vai reeditarse Once damas atrevidas. O libro leva algún tempo esgotado en galego e portugués. En Portugal forma parte do Plano Nacional de Leitura, o que fixo que se esgotase con bastante rapidez.
Agora, por fin, os lectores das dúas variantes lingüísticas van poder seguir disfrutando desta lectura.
Os libros de OLI 